AMMORE E GELUSIA Wincenzo De Bernardo

 

Arete a nu banco ‘e nu supermercato,
ncopp’’a na scansia, chiena ‘e butteglie,
na bella matina, all’ora d’’a sveglia,
e che sentette, io, mò, v’’o sto’ a di’:
-“ Neh, bella-be’, tu me stai sentenno?
- Ce l’hai cu mme? – Eh, ce l’aggio cu tico !
Te stai appruffittanno, quello è mio amico
e, tu, chesti ccose nun he può fa!”-
Chi alluccava era na birra
ca ce l’aveva cu na gazzosa
ca rispunnette: “ Neh, uè, ntussecosa,
che t’ha pigliato, ma,  pe’ sapè?”-
- “Che m’ha pigliato? E io, mò, t’’o dico:
che ce facive c’’o fiasco ‘e vino?
Si veco ancora ca te mbruscine,
na brutta fine te faccio fa!”-
- “ Neh, bella bionda, che vai truvanno,
si ‘o vuò sapè, è stato proprio isso
che m’ha invitata e sempe cchiù spisso,
mi ha detto: Vieni, auniscete a mme!”-
Cchiù a fianco ce steve na coca-cola
ca sciusciuliava cu n’aranciata:
-“ Ma guarda nu poco, chella sgassata,
a forza, n’appicceco vo’ provocà!”-
‘O vino ca, intanto, se steve appusanno,
dicette: “ E’ ‘o caso ‘e fa stu burdello,
io mò sto arrivanno, sono novello,
dateme ‘o tempo ca m’aggio assestà!

E, po’, nzieme a te – parlanno cu ‘a birra –
‘o sai, nun è cosa, simme diversi,
invece, ‘a gazzosa, per certi versi,
nzieme cu mme, se po’ pure ammiscà!”-
-“ He ntiso? Io bugie, ‘o sai, nun ne dico -
tutta cuntenta, dicette ‘a gazzosa, -
a mme, m’ha scigliuta, pecchè so’ briosa,
pirciò, mò, nennè, te può già arritirà!”-
‘A birra, a stu punto, se facette scura,
c’ascette pure ‘a scumma p’’e rrecchie
se dette nu sguardo, dint’’a nu specchio,
dicenno: “ E, allora, è meglio a murì!”-
-“ Ma che si’ pazza, - dicette ‘a cedrata -
pe’ te sta già pronto nu giuvinotto,
è mio cugino, se chiamma Chinotto,
nun vede l’ora e se vo’ sistemà!”-
Mò, ‘a sera, ‘o vino nzieme a gazzosa,
‘o tamarindo abbracciato all’orzata,
a fianco, ‘o chinotto cu ‘a birra ghiacciata,
sotto ‘o neon, se stanno a vasà.
Chiù ‘e lato, intanto, n’ammore proibito,
ce sta l’aranciata cu ‘a coca-cola,
ca stanno nzieme da ‘e tiempe d’’a scola,
se vonno bene ma nun se po’ di’.
Sti ddoje guaglione, signurinelle,
una cchiù bionda, n’ata cchiù nera,
sempe cchiù spisso, cchiù ‘e quando era aiere,
mò, mano int’’a mano, se fanno vedè.


© 2/3/2024 Wincenzo De Bernardo