M’aggio sunnato Napule, stanotte,
v’’o giuro, è stata proprio na surpresa:
nisciuno mmiez’’a via, faceva ‘a spesa,
na carta, nterra, nun ce steve cchiù!
Non solo, con mia somma meraviglia,
nemmeno nu criaturo, mmiez’’a via,
po’, nu silenzio…, che malincunia,
manco nu clacson e che cos’è?
Int’’o mercato, nisciuno alluccava,
nisciuno ca cantava na canzone,
pe’ mme, na nuova, brutta sensazione,
nisciuno salutava, ma comm’è?
Po’, l’autobus è arrivato in orario,
‘a gente c’aspettava, in fila indiana,
nu giuvinotto, dandomi na mano,
s’è fatto in quattro, pe’ me fa saglì!
E tutte quante a vidimà ‘o biglietto,
guardavo e me so’ asciute ll’uocchie ‘a fore,
‘o traffico? Macchè, int’’a mez’ora,
songo arrivato addò aveva jì!
E, po’, me so’ scetato…, ah, finalmente,
un incubo, v’’o giuro e, po’, aggio ntiso,
di fronte, ‘o quarto piano, ‘onna Luisa,
cantava, a squarciagola: ¨Oilì-oilà!
For’’a fenestra, a fianco, ‘onna Nannina,
stenneva ‘e panne, cu 2-3 mullette,
po’, s’ha accunciato, mpietto, ‘a camicetta:
-“ Fa troppo caldo, è overo, ‘on Vicenzì?”-
Aggio guardato abbascio e, mmiez’’a via,
na chiorma ‘e criature c’alluccava,
mentre ‘o sole, ncielo che brillava…,
Napule è bella, pure, pecché è accussì!
©03.07.2021Wincenzo De Bernardo
