Chèripo Di Wincenzo De Bernardo

Quando ‘a matina tu arape ll’uocchie,

è comme si ddoje ostriche arapisse,

comme facesse si tu nun ce stisse…,

è ‘o mare ca s’affaccia nfronte a te.

Chille uocchie tuoi songhe comme ‘e perle,

verde mmiscato c’’o celeste chiaro,

è comme stesse abbascio Marechiaro,

pure ll’addore pare d’’o sentì!

Mò, so’ tant’anne, nun è ‘a primma vota

però chello ca provo è sempe chesto:

‘a stanza è scura, chiusa sta ‘a fenesta

ma io veco dduje fanale, nfronte a mme!

E chesto me basta pe’ tutt’’a jurnata,

si pure qualche cosa me va stuorto…,

si n’ansia me fa fa ‘o fiato curto,

me passa si penso all’uocchie tuoi, nennè!

25.2.2022

©2022Wincenzo De Bernardo

PremioParoleNuove AnimaDiVento