Sutta na mpinnata
(tema canopea)
Sutta na mpinnata
di lamera arruggiata
mi passa ravanti la me vita
fujùta assicutanno
peni e currìu
ciccannu nu pocu
r'abbentu e macari
nu veru sentimentu…
Alivoti
avissi addumannatu assai?
Unnaju ceccatu la luna
ne palazzi e mancu casteddi…
ne ricchizzi e mancu denari…
Priava ppi na cuntintizza
fussi puru nica
ppi mia avissa stata ranni
quantu l'atlanticu.
E tu talé
pari ca lu signuri
sa scurdatu i mia…
Comu na tenca
sbattu a manu ritta
e a manu manca,
cu l'arma china d'amuri
e nto silenziu
lacrimi e centu preghieri
Mi riciva
picciridda vedrai passerà
rumani ammatinu si vedrà
e riciennu riciennu
astutai già chiù i cinquanta candelini
…
Ora
talìu li me jorna cu autri occhi
cu lu cori in paci,
comu a chiddi
ca ormai nun s'aspettanu
chiù a manna ru celu…
comu chiddi ca hannu caputu
ca lu propriu destinu è autru
e cu signu ra cruci
chiddu ca vulissi ju,
lu rrialu a lu munnu
picchi sacciu cosa voli riri mancanza.
Accussi ju sugnu sempri cca…
Sutta na mpinnata
di lamera arruggiata,
cu na cica tra li irita
a dari
a li jorna da me vita
nu sensu…
E ravanti a mia,
n'arbiru ranni
e prima ri ll'arbiru na varca
e prima ra varca la plaja
e prima ra plaja lu mari
e prima di lu mari la me terra
e prima di la me terra l'infinito
e prima ri l'infinito
Lu me Orizzonti.
© Giovanna Malara (Saturnia Settantasette) PremioParoleNuove AnimaDiVento2022
